Kva driv Balestrand Adventure med?

Me skal gjera det betre å bu i midtre Sogn. For gjestar og for sogningar. Ved å selja guida turar.

Så enkelt er det.

Møtet mellom gjest og fastbuande står i sentrum: den guida turen. Ein slik tur varer gjerne mellom ein halv time og ein halv dag. Men det er desse opplevingane som gjestane hugsar frå ferien, ikkje timane på flyet, i bilen, eller på hotellrommet. Desse turane kan gi gjestane enorm verdi.

Og dei kan gi gode inntekter til guidane og resten av bygda vår, pluss at me får sjølv nyta den gode infrastrukturen som reiselivet gir. Sjå berekraftspolicyen vår.

Derfor skal me skal leggja til rette for fleire guida turar og betre guida turar. Og me skal halda det gåande ved å ta 15 % av alt me sel. Det er bedriftsmodellen.

I praksis driv me med 3 ulike aktivitetar. Me

1. Publiserer tekstar og bilder. Me hjelper gjestane i ferieplanlegginga med artiklar og produktsider. Målet er å selja fleire produkt.

2. Arrangerer uformelle samlingar. Me hjelper partnarane våre til å laga fleire og betre produkt.

3. Snakkar med gjestar. Me svarer på spørsmål på kontoret vårt og via e-post.

Det me ikkje driv med er

1. Guiding. Dette er partnarane våre som gjer.

2. Ferieplanlegging. Dette er gjestane våre sjølve som gjer.

Denne manualen viser korleis Balestrand Adventure fungerer backstage. Han er meint for partnarar, tilsette eller dei som vurderer å oppretta eit liknande samarbeid.

Samarbeidsmodellen har ein kalla “hub-modellen”, der nokre lokal aktørar saman driv produktutvikling, marknadsføring og turistinformasjon i lag.

Innhaldet er delt opp slik.

1. Marknadsstrategi

2. Stilmanual

3. Målgrupper

4. Salgssamarbeid

5. Kontinuerleg forbetring

6. Digital infrastruktur

7. Statistikk

Marknadsstrategi

Planen er ikkje så vanskeleg: Me skal svara på spørsmål som gjesten stiller seg mens ho planlegger turen.

Men ikkje alle spørsmål; me bruker energi på 2 typar:

1. Spørsmål om destinasjonen vår, som “korleis kjem eg meg til Balestrand?” eller “kor er det fint å gå tur der?”. Me vil at gjesten bookar eit lengre opphald her, med god tid til å vera med på turar. Derfor leiar me gjesten forsiktig inn mot Things to Do in Balestrand, hovudartikkelen vår.

2. Spørsmål om produkt, som “kva slags båttur bør eg velge?” eller “kor mykje kostar ein guida fjelltur?”. Vi vil at gjesten føler seg trygg nok til å booka før ho kjem til Balestrand.

I starten av planleggingsfasen er det gjerne generelle spørsmål som “gode fjellturar på vestlandet” eller “overnatting i Sogn”. Dette er ansvarsområdet til Visit Sognefjord; mebruker ikkje energi på desse.

Me har ei liste med relevante spørsmål, som er grunnlaget for alt me publiserer. Den blei oppretta i 2018 og inneheld i dag cirka 300 spørsmål. Lista er sett saman av:

1. E-postar til balestrand@sognefjord.no

2. E-postar til booking@balestrandadventure.no

3. Reiselivsforumet på Tripadvisor

4. Reiselivsforumet på Lonely Planet

Her er nokre døme frå lista:

1. Kva er deste måten å koma seg til Balestrand frå Bergen?

2. Er det en plass å leggja frå seg bagasje?

3. Kva er skilnaden mellom RIB-turen i Balestrand og den i Flåm?

4. Kan vi kjøpa mat ombord på Fjærlandsbåten?

Basert på lista lager vi bloggpost-idéar som kan svara på dei viktagaste spørsmåla, altså dei blir spurt mange gangar, og har med produkt å gjera – til dømes spørsmålet om mat på Fjærlandsbåten.

Bloggen og sosiale media

Bloggen er kjernen i marknadsstrategien vår. Innhald på Facebook, Instagram og i nyheitsbrevet skal støtta bloggen. Vidare støttar me bloggen vår ved å lenka dit i e-postar vi sender, om dei er svar på førespurnadar eller som nyheitsbrev.

Annonseplan

Vi køyrer kampanjen “thingstodo” mot folk som har gjerne har høyrt om Balestrand, men ikkje veit kva ein kan gjera. Kampanjen består av:

• Annonse på Facebook

• Annonse på Google Søk

• Annonse i Sognefjordguiden

UTM-lenke retningslinjer

Det blir ein del ulike lenker inn til bloggpostane våre: frå Facebook, Google, e-postar og så vidare. Me skal følgja med på kva slags lenker som blir klikka mest. Då kan me bruka meir energi på kanalane som fungerer best.

Det vil seie at lenker til bloggpostar skal vera UTM-lenker. Me bruker desse parametera:

• Source: google, facebook, visitsognefjord, instagram, mailchimp

• Medium: email, paidsocial, social, print, paidsearch

• Campaign: Namnet på bloggposten i små bokstavar, utan mellomrom. Bokstavane å, æ og ø skal skrivast aa, ae og oe. Til dømes hotelsinbalestrand.

• Content: Bruk litt sunn fornuft. Til dømes er den engelske versjonen av ein annonse merka engelsk og den norske merka norsk.

Bruk kontoen vår på utm.io til å setja saman lenkene. Her ligg parametera klare slik at du ikkje kan gjera feil.

På Facebook gjer me det slik:

utm_source={{placement}}&
utm_medium=paidsocial&
utm_campaign=thingstodo&
utm_content={{ad.name}}

På denne måten skil Facebook sjølv mellom dei ulike plasseringane.

{{placement}} gir deg:

Facebook_Desktop_Feed
Facebook_Mobile_Feed
Facebook_Right_Column
Messenger_Home
Instagram_Feed
Instagram_Stories

og {{ad.name}} gir namnet på annonsen. Men hugs! URLen kan ikkje ha mellomrom i seg. Pass på at annonsenamnet ikkje har mellomrom, eller skriv det inn manuelt.

Stilmanual

Hos Balestrand Adventure møter du sogningen i sitt element. Han er litt uhøvla kanskje, men ekte, heilt seg sjølv. Han er engasjerande og lett å forstå. Gjesten føler seg velkomen og ivareteken.

Skrivestil

Me skriv korte setningar, rett til poenget. Me bruker gjerne idomar, slik me gjer i daglegtalen. Me bruker eg-forteljar, og skriv gjerne namna våre. Det skal vera tydeleg kven som er avsendaren. På norsk følgjar vi dialekten i Midtre Sogn. Til dømes bruker vi a-infinitiv (å eta, å smila) og bruker j i ord der det er valfritt, som byggja og tenkja. På engelsk skriv me på amerikansk. Til dømes skriv me color i staden for colour. Bruk gjerne hjelpemiddel som Hemingway Editor og Simple Writer.

Klokkeslett skal skrivast med 24-timarsklokke, slik: 16:00, ikkje 4:00 PM. Prisar skriv me med forkortinga kr (ingen punktum), ikkje NOK. Til dømes 900 kr, ikkje 900 NOK. me skriv mellomrom mellom store tal, slik: 20 000 kr, ikkje 20.000 kr.

Typografi

Typografien skal støtta skrivestilen: enkel, uformell og lett å forstå. Me bruker fontane Source Sans Pro og Source Serif Pro. Desse er lett å finna på dei fleste programma, og den er laga for å vera godt leseleg, sjølv på små skjermar. Tekstfargen skal ikkje vera heilt svart, viss det går an. Bruk heller ein mørk gråfarge, som Hex(1A1A1A). Dette skal vera litt lettare å lesa. Slik skal dei ulike teksttypane vera:

• H1: Source Sans Pro, 400 weight 41 px eller 31 pt,

• H2: Source Serif Pro, 700 weight, 21 px eller 16 pt

• H3: Source Sans Pro, 600 weight, 20 px eller 14 pt

• Brødtekst: Source Serif Pro, 400 weight, 17 px eller 11 pt

Bruk helst ikkje H3. Det er vanlegvis ikkje vere behov for å dela inn ein tekst i så mange nivå. Ein skal helst halde seg til H1, H2 og brødtekst. Bruk feit tekst i den første frasen eller setning i ein artikkel. Bruk kursiv og feit tekst elles berre når det er absolutt nødvendig for å få fram tydinga.

Bruk gjerne punktlister i staden for komma viss du skal ramsa opp ting. Og hugs at det er lettare å lesa brødtekst når linjene er korte, helst 45–90 bokstavar (inkludert mellomrom). Bruk laus høgrekant.

I alle e-postar bruker me eit enkelt oppsett og færrast mogleg andre element. Til dømes bruker ikkje me bilete, knappar, ulike skrifttypar og så vidare. Sjå eit døme på ein e-post her.

Tabellar skal ikkje gjera noko stort ut av seg. Øvste rad skal ha feit skrift, men elles skal teksten vera vanleg. Linjene imellom skal vera lysegråe og så tynne som mogleg. Tabellar skal vera høgrejusterte slik at tal blir lettare å samanlikna. Tekstkollonar skal vera på venstresida. Sjå til dømes nedanfor. Dette er standard-oppsettet som finst i CSS-koden på nettsida vår. Bruk gjerne Tables Generator til å laga HTML-koden.

Bilete

Bileta våre skal òg spegla verdiane til Balestrand Adventure. Dei skal vera klare, fargerike, kontrastfulle og ujålete. Me bruker bilete av folk framfor landskap. Me bruker ikkje bilete som ser oppstilte ut, eller bilete der ein ser berre ryggen til folk.

Bileta ligg i programmet Lightroom, med backup på Balestrand Adventure sin Google Disk. Nedst på nettsida vår lenkar me til eit Lightroom-album sortert etter produkt. Dette er meint for turoperatørar.

For å få ein felles profil på bileta bruker me same Lightroom preset på alt. (Ein preset er eit sett med innstillingar for fargar, kontrast og lys.) Me bruker ein som heiter “Ethereal Scene”, som er laga av fotografen Melissa Findley og lasta ned gratis frå Adobe sin blogg. Du kan òg laste dei ned her.

Målgrupper

Tenk du er på restaurant i København, men dei gløymde potetene dine. Du seier vel ikkje “kest e potedn”?

Tenk du sender ei saftig tekstmelding til kjæresten. Du skriv vel ikkje “med vennleg helsing” på slutten?

Me må alltid tilpassa oss dei me snakkar med.

Korleis taklar me dette i Balestrand Adventure?

Tekstane og bileta våre skal vera retta mot dei tre gruppene som tradisjonelt har besøkt Balestrand, og som me leverer best til. Nedanfor har eg oppsummert dei, og gir døme på tilpassa tekstar og bilete.

Dei som ikkje har ro i røvi

Denne målgruppa svarar til Visit Norway si målgruppe Dei eventyrlystne. Dette er dei som skal finna seg sjølv på ein ukjent fjelltopp. Dei som forventar å sjå Gud på Nærøyfjorden. Dei skal som føla seg som den første som besøker ein plass. Alt handlar om forbindelsen med seg sjølv i naturen, og nesten spirituelle opplevingar.

Derfor bruker me eit nesten spirituelt språk når me snakkar til dei. Me legg vekt på naturopplevinga og korleis det påverkar deg. Bilete skal gjerne visa éin person som får denne opplevinga. Ei skildring av Balestrand tilpassa ein slik person kan sjå slik ut:

High mountains. Deep valleys. A fjord that stretches 1000 meters below you. And when the light is just right, it can make the jaw of even the most seasoned local drop.

Sjå òg produkttekstane og -bileta for kajakkturen og Finnabotn-turen.

Dei på leit etter kulturarven

Denne målgruppa svarar til Visit Norway si målgruppe Dei kultiverte og intellektuelle. Målet med ferien er å læra noko nytt, noko som ikkje står i reisebøkene, rett frå munnen til ein kyndig nordmann. Det er viktig at dei skal få noko å imponera vennene sine med over eit vinglas. Dei skal føla at dei er tidleg ute, at dei opplever noko før alle andre.

Derfor presenterer me lokalhistorie på ein måte som gjer at gjesten kan fortelja om det sjølv heime. Me skal etablere at guidane har autoritet i feltet sitt, og at me ligg utanfor den tunge turistløypa. Men me skal ikkje bruka for store eller vanskelege ord. Dei skal føla at dei er antropologar blant urinnvånarar, ikkje studentar blant professorarar. Bilete skal visa autentisk formidling frå ein autoritietsperson.

Ei skildring av Balestrand tilpassa ein slik person kan sjå slik ut:

Viking graves. Modern museums. Stunning wooden architecture. Glaciers looming in the distance. In Balestrand you’ll find a well-preserved source of inspiration for art, travel, and storytelling—there should be plenty to tell about when you return home.

Sjå òg produktteksten for cidersmaking.

Dei som skal møte sogningen

Denne målgruppa svarar til Visit Norway si målgruppe Dei sosiale. Dei er på leit etter det ekte. Målet med ferien er å forstå korleis det er å bu her i dag. Det gjeld mat, tradisjonar, språk og så vidare. Historie er viktig, men ikkje hovudtema. Dette er dei som alltid spør “So what do people do here?”

Dei skal føle seg velkomne. Derfor skriv me på ein personleg, vennleg måte. Me skal vera oss seg sjølve, bruka dialektnær nynorsk. Bilete skal vise folk saman, smil og ansikt.

Ei skildring av Balestrand tilpassa ein slik person kan sjå slik ut:

Cold. Reserved. Introverted. You may have heard these adjectives used to describe Norwegians. The people of the Sognefjord are a happy exception. The people here have a reputation for being loud, boisterous and a little over-the-top. They just might be easier to get to know!

Sjå òg produktteksten for sider- og matkurset.

Tilpassing til ferieplanleggsfasene

Me skriv litt annleis ut ifrå kor gjesten er i ferieplanlegginga. Teksttypane kan me dela inn i engasjerande tekstar og selgande tekstar.

I dei tidlegare fasane handlar spørsmål om kor og korleis dei skal reise. Her hjelper me gjesten med engasjerande tekstar: bloggsider og innhald på sosiale media. Ein skal ikkje snakka mykje om produkt eller seg sjølv — alt handlar om gjesten og kva ho treng.

I sluttfasen av planlegginga og under ferien handlar spørsmåla gjerne om produkt. Her slår me til med selgande tekstar: produktsider og annonsar. Målet er klikk på ein “call to action” som teksten er bygd rundt. Alt anna skal fjernast. Til dømes fjernar me nyheitsbrev-feltet frå produktsidene.

Sjå gjerne artiklane nedanfor.

• Litt betre reiselivstekstar

• Korleis fiksar du ein svak produkttekst?

• Knut Slinning fortel om tekstane til Juvet landskapshotell

Alle selgande tekstar hos Balestrand Adventure har ein URL som startar på /experience, til dømes: balestrandadventure.no/experience/cider-tasting. Slik kan vi følge med på korleis dei selgande tekstane presterer samla sett på dashboarden vår.

Salgssamarbeid

Balestrand Adventure handlar om samarbeid: mellom partnarbedriftene, med Visit Sognefjord og med turoperatørar. Grunnlaget for salgssamarbeidet er 3 avtaletypar:

1. Partnaravtalane. Desse regulerer vidaresalg av partnarbedriftene sine produkt hos Balestrand Adventure. Dei ligg på eSignatures. Sjå gjerne intervjuet med Joakim Systaddal om utviklinga av partnaravtalane. Alle partnarane har skrive under på same avtalen.

2. Hub-avtalen. Denne regulerer vidaresalg av partnarane sine produkt hos Visit Sognefjord. Visit Sognefjord gir ein del av provisjonen sin tilbake til Balestrand Adventure for å drive vidare produktutvikling.

3. Turoperatør-avtalar. Balestrand Adventure har ein enkel standardavtale, eller signerer avtalen som turoperatøren har.

Ein føresetnad for samarbeid mellom aktørane er standardisering. Alle partnarane bruker same bookingssytemet, Bilberry, og forpliktar seg til nokre produktstandardar. Til dømes at born blir rekna som dei 15 eller yngre, og at alle har gratis avbestilling inntil 72 timar før avreise.

Vidaresalg på balestrandadventure.no

Fordi alle bruker Bilberry kan Balestrand Adventure selja for partnarbedriftene på si eiga nettside. Det er 2 ulike måtar å kopla seg på: via eigen Bilberry-konto eller via Balestrand Adventure sin. Det er fordelar og bakdelar med kvar metode. Nedanfor forklarer eg begge metodane.

Metode 1: Med eigen Bilberry-konto

Dette er måten dei fleste partnarbedriftene har valgt. Du har din eigen fullverdig Bilberry-konto, og widgeten som ligg på balestrandadventure.no er den same som din, berre kledd ut i fargane til Balestrand Adventure. Det vil seia at betalinga går rett til din Nets-konto, ikkje via Balestrand Adventure sin.

Du ser likevel korleis bookingar kjem frå Balestrand Adventure, fordi widgeten på balestrandadventure.no inkluderer Balestrand Adventure sin Agent Referral ID, som ligg på kunderoversikta til Balestrand Adventure på din Bilberry. Denne gjer at du får opp alle bookingar frå Balestrand Adventure på fana Referral Orders. Her blir òg provisjonssummen rekna ut.

På slutten av månaden ser dagleg leiar i Balestrand Adventure kor mykje provisjon som skal betalast ut, og dette blir grunnlaget for ein faktura til deg. Dette forutset at dagleg leiar i Balestrand Adventure har innlogging på alle partnarbedriftene sine kontoar.

Når du betaler fakturaen, hukar du av på alle ordrene som fakturaen gjeld og så merkar du dei som betalt. Då blir den utbetalte provisjonssummen automatisk flytta til Tidligere utbetalinger.

Tekniske detaljar

Ein må passa på ein del ting på produktsidene. Kvar produktside må ha denne i <head>:

<script type="text/javascript">
window.BilberryWidgetsGlobal = window.BilberryWidgetsGlobal || {};
window.BilberryWidgetsGlobal.referralCode = 'DIN BALESTRAND ADVENTURE REFFERAL ID CODE';
window.BilberryWidgetsGlobal.skipBasketOnBook = true;
window.BilberryWidgetsGlobal.language = 'en-US';
window.BilberryWidgetsGlobal.bilberryAccessToken = 'DIN ACCESS TOKEN';
window.BilberryWidgetsGlobal.termsUrl = 'https://www.balestrandadventure.no/terms-and-conditions';
window.BilberryWidgetsGlobal.privacyUrl = 'https://www.balestrandadventure.no/privacy-and-cookie-policy';
window.BilberryWidgetsGlobal.bilberryBaseApiUrl = 'DIN BILBERRY URL';
</script>

Det vil seie at kvar produktside treng:

1. Referral ID for Balestrand Adventure frå partnaren sin Bilberry-konto. Denne ligg på kundeoversikta.

2. Access Token frå partnaren sin Bilberry. Denne ligg under Innstillinger.

3. Lenkene til Balestrand Adventure sine kjøpsvilkår og personvernerklæring.

I tillegg er det viktig å inkludera denne:

window.BilberryWidgetsGlobal.skipBasketOnBook = true;

som slår av handlekorg-funksjonen, der ein kan ha fleire ulike produkt i same korg. Dette er fordi systemet ikkje taklar å ha produkt frå fleire leverandørar på same transaksjonen.

Det er òg litt ekstraarbeid med bekreftelsen som går til kunde. Om ein ikkje gjer noko, vil e-posten til kunden koma frå partnaren. Dette kan skape forvirring når kunden har kjøpt hos Balestrand Adventure. For å hindra dette må ein huka av på feltet “Stopp utsendelse av ordrebekreftelsesmail på online booking?” under Agentinnstillinger på Balestrand.

Så må ein gå inn på Webhooks og sette opp ein webhook med Zapier. Inne på Zapier ordnar du teksten på e-posten som går til kunden frå Balestrand Adventure. I dag (mars 2022) har ein ikkje gjort dette for alle partnarane.

Metode 2: Med Balestrand Adventure sin Bilberry-konto

Nokre partnarbedriftene har valgt å ikkje ha sin eigen Bilberry-konto. Då får dei ein leverandørbrukar på Balestrand Adventure sin konto. Pengane går til Balestrand Adventure sin Nets-konto, og partnaren må fakturera Balestrand Adventure for bookingane minus provisjon.

Det er nokre begrensingar med denne metoden. Du kan ikkje oppretta produkt sjølv, endra på produkttekstar og bilete sjølv, ta betalt frå kunden sjølv, eller opprette avgangar sjølv. Du kan likevel justere kapasitet sjølv.

Kva type vidaresalg er rett for meg?

Det er litt å følgja med på! Om du er ny og vurderer kva som er best har me ei lita sjekkliste her:

Metode 1 (eigen Bilberry-konto) er best viss du

• Sel ein del til turoperatørar sjølv

• Ofte endrar på produkta dine

• Ofte opprettar nye produkt

• Har mange privatturar og arrangement

• Tek imot bookingar på eiga nettside

Metode 2 (leverandørbrukar på Balestrand Adventure sin Bilberry-konto) er best viss du

• Har nokre få enkle, relativt statiske produkt

• Ikkje ønsker å setja deg inn i eit komplekst program

Salg via turistkontoret

Når turistar kjøper over disk på turistkontoret går pengane til Zettle. Kvart produkt skal taggast med leverandørnamn slik at det enkelt går an å oppretta rapportar for kvar leverandør. Desse rapportane blir sende ut på slutten av kvar månad, og så fakturerer partnarane Balestrand Adventure, minus provisjon.

Salg via Visit Sognefjord

Visit Sognefjord sitt bookingsystem, Blend, er integrert med Bilberry. Dette gjer at partnarane kan bli solgt av Visit Sognefjord. Sjå til dømes produktsida for Mini Fjord and Glacier Tour.

Pengane går via leverandøren Adventure Tech og så til partnarbedriftene. Sesongen 2022 er første gangen me gjer dette, og det er enno uklart kva slags fakturaflyt blir best.

Kontinuerleg forbetring

Sogningar er nysgjerrige. Og heller ikkje redde for å testa ville idéar.

Det same gjeld Balestrand Adventure.

Me prøver å setja denne nysgjerrigheiten i system ved å skriva ned hypotesane våre og testa dei éin om gangen.

Me prøver å forstå kva som skjer med gjestane på nettsida vår. Me sjekkar Google Analytics jamt og leiter etter mønster: Kva sider presterer dårlegare enn forventa? Kvifor?

Heile vegen skriv me ned hypoteser me har lyst å testa. Til dømes:

• Sjå om produktbilde A gir fleire kjøp enn produktbilde B

• Sjå om synlegare avbestillingsvilkår gir fleire kjøp

Me skal alltid ha nokre eksperiment gåande på Google Optimize, der me testar dei viktigaste hypotesane. Sjå til dømes korleis me fekk mykje betre resultat frå “Things to do”-sida.

Det same gjeld annonsar hos Google og Facebook: Me skal ha eit par ulike versjonar gåande samtidig.

Rett nok har me for lite trafikk til å testa skikkeleg, men er det ein grunn til å venta med eksperiment?

Korleis skal me elles bli betre?